" ) שמונה פרקים ( " [ המקור הערבי ] קד בינא פי צדר הד'א אלתאליף מא אלסבב אלד'י ג'על אלמדון ית'בת הד'ה [ אל ] מסכתא פי הד'א אלסדר , וד'כרנא איצ'א עטי'ם אלמנפעה בהדיה אלמסכתא . וקד ועדנא מראת פימא תקדם מן הדיא אלתאליף באנא נתכלם פי הדיה אלמסכתא פי אגראץ' מפידה , ואנא נטול פיהא בעץ' תטויל , לאנהא ואן כאנת בינה סהלה אלתפהם בחסב אלט'אהר , פליס אלעמל במתצ'מנהא סהל עלי ג'מיע אלנאס , ולא איצ'א ג'מיע אגראצ'הא מפהום דון שרח שאף , מע כונהא מודיה אלי כמאל כתייר וסעאדה חקיקיה . ולד'לך ראית באן נשבע פיהא אלקול . וקד קאלוא [ עלי ] הם אלסלאם [ האי ] מאן דבעי למהוי חסידא לקיים מילי דאבות . ול [ יס ] ענדנא מ [ רתבה פ ] וק אלחסידות גיר אלנבוה , והי אלמודיה להא , כמא קאלוא דוס [ ידות ] מביאה לידי רוח הקודש . פקד צח מן קולהם אן אלעמל באדאב הד'ה אלמסכתא [ מודי ] אלי אלנבוה , וסנבין חקיקה ד'לך , לאנהא משתמלה עלי ג'ז כביר מן אלכ'לקיאת . וראית באן אקדם קבל אן אכ'ד' פי שרח הלכה הלכה פצול מפידה , יחצל ללאנסאן מנהא מקדמאת , ותכון לה איצ'א כאלמפתאח למא נסתקבל מן אלשרח . ואעלם אן אלאשיא אלתי אקולהא פי הד'ה אלפצול ו...
אל הספר